Í grænlensku sjoppunni afgreiðir kryddálfurinn stundaglös....

Orðstír.  Umbúðir utanaf karftöfluflögum fjúka til í vindinum.  Það var gleðskapur í næsta húsi í gær.  Það þarf að sópa þessar hellur sem þekja andlit mánans.  Í drullupolli laugar sig fallinn engill sem freistingar holdsins stóðst ekki.  Það er á boðstólum kjúklingur frá Kamerún.  Kryddálfur frá Narníu.  Æi, hvað er að heyra.  Hefur einhver matarlyst í þessum stofuhita ?  Sumir hverjir leggja mikið uppúr því að vera stundvísir og duglegir.  Það má segja slíkt hið sama um gangverk í úri.  Og launin eru þau hin sömu, vanþakklæti og hvísl í vindi.  Tikk takk, hætta nú.  Þetta ríkidæmi er altaristafla skreytt með höfuðkúpum verkamanna sem gáfu líf sitt fyrir stundarfrið frá tannhjólum atvinnulífsins.  Mulningsvélin er knúin af hugsunum.  Einföld jafna fyrir velgengni í lífinu.  Samt svo flókin.  Drekkið öl og gleðjist yfir því að hafa vaknað til vitundar sem mannvera en ekki maur.  Sýnið þakklæti og berið virðingu fyrir öllum lífsformum.  Hvað er líf annað en nokkur spor á strönd tímans sem brátt verða út máð af öldum ára ?  

   

TENINGALAGA SPEGILL

Forsíða daglegrar þjáningar í vélrænum leik við tannhjól ríkidæmisins.  Verðmerkt fólkið telur stundirnar sem líða í baráttunni við að halda sér á floti.  Þau hafa það svo gott, vélmennin sem vaka dag og nótt við sykurkörin að smyrja sér brauðsneiðar með slátri.  Vei þér dugnaðarforkar með hugsun á við hund sem hlýðir húsbónda sínum og dinglar skottinu í von um bein.  Vei þér stöðumælaverðir á vegum lífsins sem passið uppá  keisarans skegg og heimtið skattinn.Brauðstritið er til einskis því að við tekur dauðinn.  Ánamaðkar strita við að grafa göng blindir í leit að gullinu sem nærir blómini.  En þeir finna aldrei neitt.  Bara eilífa angist sem situr að lokum á grafarbakkanum og hlær.      

Um húsflugur og tilvist æðri máttar

Dauðar húsflugur fara ekki í könnunarflug að endimörkum alheimsins.  Hvað tekur við þegar þakrennur skuggahúsa fyllast af laufum dauðans ?  Það útheimtir hugsun að svara slíkri spurningu.  Tilvist efans er það sem skilgreinir mannveruna.  Að taka ekki lífinu sem sjálfsögðum hlut er dýrmætt..... efnið er hverfult en andinn sem glæðir holdið lífi hefur ekki verðmiða.  Stöðutákn er stytta hégómans.... stéttaskipting er hlutabréfabrask þar sem vísitölur taka mið af efnislegri eign.  Það fær engin inneignarnótu uppá himnaríkisvist hjá guði þó að hann eigi Range Rover.   Sælir eru fátækir í anda því að þeirra er himnaríki.    

Hafsjór orða

Þingeyskar sauðkindur innlyksa í fannferginu skortir hugmyndaflug til að fljúga yfir freðna jörð og nema land í grænum dal þar sem aldrei snjóar og grasið er vítamínbætt af töfrasólskini frá öðrum heimi.  Harðbýlt er á heiðum hins eilífa veturs.... vélsleðakindur ganga þar örna sinna í pappakassabyggingum sem byggðar voru fyrir styrki frá landssambandi 4 laufa smára eigenda.  Þeir ávaxta pundið sem aðgang hafa að fjárhirslum smáraveldisins.  Heppnin er með þeim sem kunna skil á gangverki álfanna er búa í hellum hugans.